كتب إيهاب المهندس

اعترف الإرهابي على عبد الونيس، القيادي فى حركة حسم الإرهابية بدموع الندم، قائلا: "التنظيم والجماعة صوروا الحرب حرب دين وهي مش كده، هي كانت حرب سلطة حرب كرسي يعني.. حرب كرسي، حرب السلطة والكرسي متستاهلش ظفر واحد مش دم. وأقول لقيادات التنظيم المسلح اللي لسة لحد دلوقتي بيشتغلوا في تنفيذ عمليات ضد الدولة كفاية. كفاية، كفاية أرواح الشباب اللي ضيعتوها. وكفاية، وكفاية أعمارهم اللي بتضيع في السجن، بدون سبب يعني إلا بس عشان مصالح شخصية، سواء مصالح شخصية أو سياسية يعني. أو فلوس ماهو كل واحد بيدور على مصلحته، كل واحد بيدور على مصلحة بيجري وراها اللي بيدور على منصب واللي بيدور على فلوس واللي بيدور على جاه. فكفاية، كفاية حسبي الله ونعم الوكيل في أي حد بيوجه الشباب وبيضيع أعمارهم مقابل لا شيء يعني.

أقول للي كلفني بكده كفاية، كفاية دم عموماً يعني كفاية دم، يعني بعد ما بعد ما قعدت وفكرت مع نفسي حسيت إني إني ضيعت عمري هدر يعني. لا شيء مقابل لا شيء في فكرة فاضية في فكرة مفيهاش مفيهاش أي حاجة. عشان كرسي؟ عشان سلطة؟.

وتابع: أوجه رسالة لمراتي إن هي يعني.. تهتم بابننا وتربيه تربية صحيحة، تربية على الإسلام الصحيح يعني. ما تنضمش لأي تنظيمات ولا أي مؤسسات ولا أي فكر غير صحيح.. ما تنضمش لأي حاجة ولا تخليه ينضم لأي تنظيمات ولا أي مؤسسات هو الإسلام، الإسلام كفاية يعني. وهوجه رسالة لابني محمد لو شوفت ابني هقول له هقول له خلي بالك من نفسك يعني، نفسك نفسك غالية فمضيعهاش في الفاضي. مضيعهاش في حاجة، في حاجة متستاهلش. كل الدنيا متستاهلش إن إنت تضيع نفسك عليها. لا حكم ولا سلطة ولا حرب بين بين كرسي ولا أي حاجة، مفيش حاجة تستاهل إن إنت تضيع نفسك عليها. حافظ على نفسك وحافظ على أمك وراعي ربنا في حياتك كلها. ما تعملش حاجة حرام، لأن الوقفة قدام ربنا.. الوقفة قدام ربنا صعبة، محدش فينا، محدش فينا يستحمل الوقفة قدام ربنا، فلازم تكون مستعد للوقفة دي أو لليوم ده.