حلت النجمة نيللى كريم ضيفة في برنامج "يوم ليك" للإعلامية سمر يسرى، المذاع على قناة الحياة، وتحدثت عن مواقف في طفولتها قائلة: "وانا صغيرة في موقف لا أنساه وأنا عندى 5 سنين كانوا بيقولوا عليا بنت كيوت ولما يسألونى اسمك إيه وأقولهم نيللى يتريقوا عليا ويقولوا نيللى بتاعة الفوازير".

وتابعت نيللي كريم: "كنت بغضب أوى وأقول أنا مش نيللى بتاعة الفوازير، ويصادف أن أول حاجة في حياتى أعملها في التمثيل هي الفوازير، وفاكرة موقف كمان لا أنساه لما رجعنا مصر، وكنت بروح أكاديمية الفنون معهد الباليه، ووقتها عملت ألف ليلة وليلة، وفاكرة إن في خبر كان في الجورنال نيللى محمد السيد عطالله، لقيت والدى مقصقص الجزء ده ومحتفظ بيه".

وعن العُقد الموجودة في حياتها قالت نيللى كريم: "دايما بيجيلى حلم اللى بحلمه إن عندى عرض في الأوبرا وانا متأخرة والعرض راح عليا، ومش بحب الأماكن المغلقة، ولا الارتفاعات، وبخاف من الاكتئاب ومش بحب أكتئب وبهرب من فكرة ان مودى يبقى وحش، وابعد عنها تمام، واسمع حاجات إيجابية واسمع مزيكا".